1949 оны 11 дүгээр сарын 06-нд Улаанбаатар төмөр зам ашиглалтанд бүрэн орж байгааг тэмдэглэж эхний ёслолын галт тэрэг Сүхбаатар өртөөнд ирж энэ өдрийг Сүхбаатар өртөөг байнгын ашиглалтанд орсон өдөр болгон тэмдэглэсэн юм. Гончигийн Бумцэнд тэргүүтэй БНМАУ-ын дээд хэмжээний төлөөлөгчид Сүхбаатар хотод хүрэлцэн ирж, бага үдэд буюу морин цагийг тааруулан 11 цаг 40 минутаас 12 цагт анхны галт тэргийг хүлээж авахаар Г.Бумцэнд даргын саналаар шийдвэрлэсэн нь шинэ ирж байгаа төмөр хөлөг галт тэргийг Монгол хүний бэлгэдлээр хүлэг морьтойгоо жишсэн уламжлалт ёсны сайхан бэлэгдэл болжээ. Монгол түмний бэлгэдэл ёсоор нь галт тэрэг товлосон морин цагтаа ирж улсын бага хурлын дарга Г.Бумцэнд, ерөнхий сайдын нэгдүгээр орлогч Ч.Сүрэнжав, Намын Төв Хорооны нарийн бичгийн дарга Д. Дамба гурван өнгийн торгон тууз хайчилж нээсэн түүхтэй.